臨考試前西文老師帶我哋一班同學仔去field trip。目的地為La Boca, 一個歐洲水手18世紀末最早登陸Buenos Aires嘅地方。
我哋一落車眼見七彩繽紛嘅鐵皮屋外牆，仲有街道兩邊無數可愛嘅馬勒當拿雕像，好興奮啊！沿著鐵皮屋行到盡頭，面前一個水平如鏡嘅河口，對岸有大大小小舊碼頭遺留下來嘅建築物，偶爾微微聽到工人用槌仔哼敲的打鐵聲，內心頓感平和安寧。
慶幸此行非走馬看花，老師邊行Caminito(彩色小巷)邊講解呢個小小嘅遊客區點解咁值得到此一遊。19世紀初開始湧入大量意大利及西班牙裔水手，同時亦有加勒比海到來嘅移民，碼頭工人。呢班人全部身無分文，用血用汗喺碼頭工作賺工錢維生計。適者生存，新移民利用造船廠廢棄嘅木材同鋅版搭起鐵皮屋，然後用船塢剩餘的塗料粉飾鐵皮屋外牆，由於係剩餘物資，有咩顏色剩就塗咩色，不經意地造就咗今日繽紛奪目嘅名勝古蹟。
街頭巷尾，我哋隨處可見呢度國粹Tango探戈音樂同探戈舞蹈。世估唔到原來La Boca正正係Tango嘅誕生地原鄉！點解？又有故仔聽。
話說呢班水手同苦力，隻身到異鄉打併的男人，為咗忘記寂莫孤獨嘅思鄉情，就開始用舞蹈同音樂填補鄉愁嘅空虛。講白啲，班男人太寂莫又無女人喺身邊，就同一班舞女蟻嬲蜜糖咁一拍即合，呢個當時屬低層社會舞蹈開始發源起來。
此行我好身同感受，或者因爲都係個身在異鄉嘅遊牧民族。論不及呢班早期移民嘅強桿，但用身邊一切事物令自己活得更充實，用笑容忘卻鄉愁嘅空虛，我明。
種瓜得瓜，為咗同好快就成為我家人嘅意佬有更好嘅將來，再漂流多一排囉。
心繫現在，不貪未來。將來嘅事無人會預料得到，我只知道無論遇到任何事，都心無旁騖照顧好意佬，最起碼每當佢公事私事遇到咩阻滯我都一定喺佢身邊好好做佢嘅聆聽者。
#LaBocaDeBuenosAires
#Caminito
#Tango
#跟佬走到這個世界最南端
Search